في حضني خبتها

 ولع بخور..

واصرخ تحت قنديل أم هاشم.

دمع بحور..

واندب علي الميتين منك .

مين في سطور..

يشرح مأساتي اللعينة ؟؟

زورت دمعي بضحكة.

زورت حزني بفرحة.

زورت قولي البليد...

بكلام ماليه الحماس.

هتفت ضد الموت.

بصرخة مسموعة.

سال حزني مني بحور...

وضلوعي موجوعة.

ساعة طلوع الروح ...

كنت أنا الميت و هي موجوعة .

نزلت بحر الحزن من أول السكة.

مسكت في ايدي النار..

النار صارت سكة.

مين يوعظ المقتول ...

يقابل الموت علي وشة خيال ضحكة ؟؟

ولع بخور...

و اصرخ تحت قنديل أم هاشم.

انا في حزني بقيت لوحدي فيه عايم.

اللي بصبح فيه أبات فيه نايم.

ارسم علي الشفة ضحكة قتيل غرقان.

مسجون في حالة حزن أخره مش هيبان.

طول الطريق وحدي طول الطريق بردان.

كان الدفاء ساعة...

والبرد عمره سنين.

وانا في ساعة الفراق يسيل قليبي حنين.

الله علي الاحزان...

بتبين الجدعان.

اللي ساعة حزنك...

يحزنوا هما كمان.

تعزف بناي الحزن...

يردوا هما بكمان.

ولع بخور..

و اصرخ تحت قنديل أم هاشم.

ماتت حبيبة الروح.

ماتت في خلوتها.

راح الزمان ولي..

غاب عني ضحكتها.

ضحكتها كانت الشمس...

وانا كنت دنيتها.

دنيتها كانت دنيتي...

سابت في قلبي حزن والف كلمة ياريت.... 

ساعة الوداع من الموت في حضني خبتها

رجعوني

 دوبوني عينيكي دوب.

رجعوني  اعشق و ادوب ...

رغم حلفاني اني اتوب.

رجعوني تاني ادوب.

.

رجعولي البسمة ليا.

يا جميلة يا اجمل صبية.

اضحكي و امليني فرحة.

سيبي كفك في ايدايا.

.

العيون غزلان تحير.

رجعوا قلبي الصغير.

لعبوا بجليبي و مشاعري.

كل شئ فجأة تغير #امور_شخصية

عبيط صدقت الأمل

انفخ يا ناي لحن حزنك...
في وريد دمي.
ارسمي يا ريشة لوحة سواد...
توصف للبشر همي.
اكتب يا قلم...
دون علي الورق ألمي.
ابكي السنين...
تبكي السنين دمعي.
لم الطموح واطويه..
خلي العلم كفني.
.
يرحل نهار ويحضر في ديله الليل.
نشرب مرار والمر عمره طويل.
لا الفجر عاد ولا السماء صفيت.
ولا قلبي بطل بكاء و عويل.
فين النهار امتي يعود و الشمس تبقي دليل.؟؟ 
غاب القمر والنجم مابقاش في شئ جميل..
.
عبيط صدقت الأمل.
صار حزني اقوي من المحتمل.
قفلوا علي الشمس شباكي.
مابقتش عارف إيه العمل.
كفي ساب السلاح...
لما صف جيشي اكتمل 

لفوا علي جسمي الكفن

لا صوت يعلوا فوق صوت البلطجه..
اه ده شعار المرحله.
لا في قانون ولا حتي عُرف و مرجله.
الدولة صبحت هرجله.
ناس ماشيه عافيه بالدراع
و شويه ماشين بالصاجات والمرقعه.
و الخلق تشوفها تقولش تلج ؟؟
مع ان الدنيا مولعه.
.

برشام وسايق الجميع.
طرفين قطيع.
واحنا اللي بينهم مدهوسين.
لا بنشتري ولا حتي سايبنا نبيع.
و عريانين مابين سلوك الكهرباء.
من تحت نار من فوقنا سن المقصله.
احساس فظيع.
.
والديب بقي راعي الغنم.
وأنا متهم.
مع اني لا بيعت التراب....
ولا كنت أنا زارع اللغم.
كان كل أملي في الحياة اني أعيش.
فانزلت اهتف ارحلوا أو ارحموا...
والله ما فاكر الهتاف.
كان قصدي أعيش قام غيري خاف.
 زاد الفجُر زاد الألم.
والنسر طار ساب العلم.
. 
اقروا القصيدة والعنوها... 
أو العنوني و قولوا كفر. 
قوموا اندهوا لشيخ الغفر. 
أو اصلبوني علي  الشجر. 
قولوا اني خاين... 
و ذنبي ده لا يغتفر. 
أنا بحكي وياكم ف إيه ؟؟
كان اسهلي أكلم بقر. 
اقطعوا لساني اللي مليان بالكلام. 
أو اقتلوني ومدوا ايدكم للعدو بالسلام. 
احجزوني في زنازين الظلام... 
أو امنعوني من السفر. 
أحزان في قلبي قايده نار. 
و حزن في ملامحي اتحفر. 
.
وللأسف معرفش غيرك ليا أم.
معرفش غيرك لي وطن.
و اديني مخنوق من العطن.
والكل شامم العفن.
لكن الجميع ساب السلاح.
لعن الكفاح....
والعمر راح.
والدم ساح.
والعرض أصبح مستباح.
سال دمي انهار في الطريق.
ومفيش أمل...
لفوا علي جسمي الكفن 

أية

احكيلك إيه ما القصة عندك كلها.
يا أم عيون السحر ساكن ضيها.
هي الحياة من غيرك انتي تكون حياة؟؟
كل المشاكل في حياتي....
حضنك انتي حلها
.
اهواكي إيه ده العشق حتي ماكفنيش.
يحيني حضنك بعده مش هقدر أعيش.
هحلم ببيت تكوني فيه انتي الحياة.
كل إللي فات قبلك حبيبتي ماهمنيش.
.
أيام تفوت وأنا لسه دايب فيكي دوب.
يحلي السهر عطرك حياة ونبض القلوب.
هحكي لنجوم ليلي مشاعري كلها.
ايوه حبيبتي عن عشقك مش هقدر اتوب
.

.
عينك حبيبتي في الطريق أية و دليل.
حبك حياتي مالوش بديل.

عينيكي اخر سماء

بحور عيونك مش قصيدة....
دول يجوا الف ديوان.
مرسومه فيهم الف لوحة...
وكلها الوان.
بحور غريبة.....
صحيح بدون مرسي لكن....
وجودها أمان.
.
همسك طريق من ورد...
وضحكتك ألحان.
غنيلي غني....
و امسحي الاحزان.
شايفك طريق من نور...
سحابة فيها الخير ...
نسمة هواء حلوة...
سامعك كما غنوة...
تحبي اقولك كمان ؟؟
.
نزيد و أزيدك قصيدة..
و اهديكي نبض القلب.
رغم اني خايف اوي...
الدمعة لحظة تطب
ويبان في همسي الحزن.
خايف ادوب فيكي....
خايف ف لحظة أحب.
عايزك شقيقة روح...
عايزك نهار ابيض..
عايز اشوف الفرح...
مزين خطاويكي...
و اني أفضل احكيكي...
وتفضلي الغنوة...
وتفضلي الموال...
وتكوني آخر قصيدة....
امحي بيها الهم...
ويضيع معاها الغُلب 
.
عينيكي اخر سماء... 
يوصل إليها الدعاء.
و عيوني يتسرسب ...
 منها حنين ورجاء.
انك تدومي بفرح....
و ماحتاجش يوم للشرح.
أو اني اغنيلك..
و ايدي تتمدلك...
ترجعلي ماسكة الهواء...
وتكوني ليا دواء...
و ارسملك الفرحة...
علي جناح الطير...
و ابقي معاكي غير...
واتمني اكونلك خير...
و اصنعلك الضحكة.
ايوه انتي آخر سماء...
و آخر الأسماء

الله يصبرنا

الان بدأ الموت....
و الدنيا لبست سواد.. 
والجو مش مظبوط....
و الخلق معميه....
و الخلق شمتانه...
و قلوبنا تعبانة....
و بنختلف مرات...
و بنتفق مرة...
طعم الحياة بقي مُر...
والموت خيط بيكر....
و الضحك مش بيسر...
لكننا عايشين..
جوانا شئ ميت...
أو ب الاصح أموات...
وكلامنا كله سكات..
حياة ناقصها كتير...
و العمر برضه قصير..
مهما يطول بينا...
اخرنا متر ف متر...
تكمل يارب بستر...
الفرح شئ نسبي...
عشان يعيش قلبي....
من غير ما يتملي كره....
فالان بدأ الموت...
و الدنيا ساكته بصوت....
لكنه مش مسموع...
وخلاصة الموضوع...
كلنا اموات...
و الموت هايجمعنا...
والشوق هايوجعنا... 
لو اللي مات كان كلب....
في حزن ساكن القلب...
مهما اتملينا بضحك...
بينسحب منا...
لما تروح أرواح....
كانت فيوم بنا....
فامتشماتوش بالموت....
ده كلنا أموات....
الله يصبرنا 

سلام يلا هتموتي

حبيبتي ايوه انا اتغيرت...

و كل الفضل كان ليكِ.

فبطلت اني احكيكي.

أو جوايا أحارب مرة أحيكي.

قتلتي الحب جوايا و جواكي.

فماتلومنيش.

انتي تملي كنتي تخبي شوقك ليا..

و تداري.

فعلمتيني أكون بالمثل و اداري. 

و ماحكيش حتي عن سيرتك في اشعاري.

و أقول عاشقك وأقول ان القمر انتي.

و اني بدوب و قلبي نبضه بهواكي.

و أني و اني.... كلام ياما خبيته....

ومليتك و مليته. 

فضلت اخبي جوايا لحد القلب...

ما نسيكي.

ماعدش يهم دلوقتي بحبك أو ماحبتكيش.

.

هاتنسيني ؟؟

ما تنسيني وهو انتي من امتي كان همك...

فيوم عشقي ؟؟

او همك أكون جنبك.؟؟

سكنتي سم في دمي.

لعنة و دَبِلت قلبي.

خلاص رافضك خلاص طاردك.... 

من دمي و من عقلي. 

ولو يحكولي خلق الله ان وحشت أحلامك. 

وعينك بقت بتشتاقلي. 

خلاص انسي...

حبال الود مقطوعة وكل دروبي ممنوعة. 

لقيت بَعدك حبيبة تصون ماتبعدش....

ولا تخبيش.

ساكنة روحي وبتحكي كلام الشوق...

ما قتلتنيش.

وعَدِت ايوه و بتوفي.....

سلام يلا هتموتي.... عشان قلب حبيبتي يعيش

الغروب من الشرق

آخر غروب بنا....
الشمس كانت حزينة موت.
والدنيا زحمة....
لكن مش طالع ليها صوت.
و البشر رايحين جاين...
و الحلم بيتغسل ويتكفن...
عشان داخل التابوت.
.
رشة كافور ع الكفن...
و انا ليه متمسك.
لساني اتخرس....
اصرخ أقول عايزك.
وقلبك القاسي....
و عينيكي اللي مش شايفة...
مش حاسين بروحي اللي طالعة وهي بتحبك.
.
آخر غروب بنا.....
كان آخر غروب ع الارض.
دبل الشجر و الورد.
كل الطيور سكتت.
كل البحور نشفت.
نشف الدم في عروقك...
وقلبي مات من الصد.
قولتي كلام ياما...
مالقيتش عندي رد 
بس اللي كان مرعب.... 
ان الغروب من الشرق 

يتوه الكلام

انتي الجميلة...
و عينيكي سحر.
بحر و مواني...
و الضحكة بكر.
اكتب و أوصف....
وما يكفي فيهم...
غناوي و شعر.
.
نجمك بعيد....
يقرب بضحكة.
و بحرك غريق...
يغرق بكلمة.
و قلبك عنيد....
مع انه نسمة.
.
جميلة و رقيقة....
تطلي انور.
تضحك شفايفك..
قلبي يزهر.
تشاوري ب إيديكى...
قلب العجوز يرجع صغير.
.
يتوه الكلام...
في نظرة عينيكي.
يضيع السلام....
في لمسة إيديكى.
كلام الغناوي....
في أغاني حليم...
كله عليكي 

استوطنتك

عن كل بيوت الشعر....
اللى في منامي حلمت أنا بيهم.
و اما صحيت كنت ناسيهم.
لكن مش ناسي اللي عشانها...
ف خيالى طول الليل...
كنت عشانها بغنيهم.
من طوبة دهب و الماظ وياقوت...
كنت ابنيهم.
انا اسف جداً انى نسيت....
رغم ان جمال الحلوة كان ف الحلم...
محليهم.
ولهذا نسيت....
جايز من خمر الشفه سكرت نسيت.
أو جايز سحر عيونها خلاني أتخيل...
انى كاتبلها مليون بيت.
انا اسف جداً لحبيبتي....
لكن معذور أصل أنا حبيت.
حبيت الضحكة وشفايفها. 
حبيتها من قبل ما أشوفها. 
و هاجرت الدنيا باحوالها.
بالناس و الأرض..
وكلامي الان موجه ليكي... 
استوطنتك.
وبقيتي وطن وبقيت أنا شعب.
وبقيتي الدنيا وكل الحب.
وبقيتي علم.. اهتف بحياتك.
و احميكي و افديكى بالروح و القلب